Komunitas Blogger Bekasi » Bekasih Begaya (4) : Dioncog Bini Tua, Ampuuuun….!

Bekasih Begaya (4) : Dioncog Bini Tua, Ampuuuun….!

Posted By komar On October 13, 2009 @ 9:41 AM In Artikel | Comments Disabled

Babak ke 2 ^[1] : DIONCOG BINI TUA

Sepanjang perjalanan dari Kampung Penggilingan ke Gabus, Nya Rodieh dieeem aza, kayak burung kuntul dicekel lehernya. Nafasnya keliatan turun naek. Matanya melotot kagak bisa merem. Mencorong. Persis lampu petromak yang baru dikompa pake lampu baru. Dadanya turun naek. Mungkin kalo ada telor bebek di taro diatasnya pasti bakalan jadi telor asin. Soalnya, jadi mateng dan asin ama keringet. Hi..hi..hi…
Begitu juga si Udin Kadut. Kepelan tangannya gak brenti-brenti. Dikepel dibuka. Dikepel dibuka. Begitu terus. Soalnya serba salah. Mendingan punya perkara sama Mandor Damin. Gampang gasaknya. Ini yang bikin soal babenya sendiri. Weleh..weleh….weleh…

Maklum lah buat anak Gabus. Soal beklai itu jadi makanan seari-ari. Tiep anak muda kudu belajar maen pukul ame Kong Nasroh. Guru silat terkenal sejak zaman bleduran. Apelagi, si Udin anak Mandor Kacung. Keluarga jagoan yang terkenal sejak dulu. Engkongnya namanya Kong Komboi. Terkenal seantero Bekasi. Jagoan kagak kenal takut. Kumisnya baplang. Badannya tinggi gede.

Kalo cuman dikerubutin sepuluh orang mah kecil. Dia cuman takut ama dua orang. Dan, ini wasiat yang turun temurun diyakinin ama jagoan dan jawara Gabus dan BEkasi secara keseluruhan. Biar jagoan tapi kalah ama dua orang : yang pertama, enyaknye sendiri. Yang ngebrojolin. Yang kedua, bini tua.

Dua-duanya kalao dilawan kualat. Dua-duanya keramat. Makanya, kalo ngelawan jagoanGabus, jangan pernah manggil anak mana-mana. Cukup bawain sirih, kapur ama pinang ke enyaknye. Buat nyirih. Langsung bilang lagi ada masalah ama anaknya. Pasti dah beres.

Inilah yang terjadi ama Bang Kacung.

Dirumah dia ketamplang ketimpling kagak puguh. Hilir mudik. Dia jalan ke jendela. Megang menggel. Kepalanya muter sama si Marfuah, janda kembang yang baru kemaren die nikahin. Dia kagak nyangka si Udin anaknye suka ama tu janda. Et dah, jadi begini ya. Mana udah gue kawinin tuh janda. Bisiknya dalem ati. Emang seh demplon bener tuh bocah ya. Mana putih lagi. Turunan cina babelan seh.

Sejujurnya perasaannya beraduk. Antara seneng punya bini muda ama ngeri ama bini tua. Dia jalan lagi ke jendela yang sebelah kanan. Pucuk-pucuk daon pisang batu melambai-lambai ditiup angin. Berderet ama puun gowok yang batangnye lebih gede. Lebih tinggi dari puun pisang. Seakan mereka nyengir kuda nybirin si Kacung yang lagi puyeng lantaran kawin lagi.
“Salam lekooom….” Mendadak dari luar ada suara gegawakan.
“Kum salaam….sapa?” Kacung melangkah ke arah pintu. Ada si Boih ama si Bonin keluar.
“Elu Ih, nin ngapah?’
“Entu bang, anak buahnye Mpek Tong udah matok-matokin sawah abang nyang di Tambelang. Padahal aye dah bilang itu punya Mandor Kacung. Mereka tetep aza ngerjain….” Bacot Boih nyerocos.
“Set dah, kagak tau si Kacung dia. Emang lo kagak bilang…”
“Udah, cuman pada budeq kali. Kagak ngarti bang…” gilirin Bonin yang ngoceh.
“Emang ada sapah di sonoh…mandornye…?”
“Itu bang ada Mandor Maih dari Gombang, ada mandor Zuki dari wates, ama Jaya dah Bang….”
“Kampret….dia belon tahu golok gue kali….lu merad sonoh… bilangin anak pisangan suruh siap-siap. Cuman jangan mulain kalo gua belon kalah. Liatin aza dari pinggir sawah….”
Kacung masuk kedalam. Dia ke kamar. Dari gantung kayu, dia ambil si Toyok. Golok warisan babe bergagang gading. “Bismillahirahmaanirahiiim

….” Dia keluarin sepotong. Mulutnya komat-kamit Laa…hawlawalaa quwattailla billah…..dimasukin lagi. Itu pesen dari babenya. Sebelon dipake. Keluarin dikit bongkotnye bacaain lahawla..
Kacung ke kiri. Tangannya ngerambet peci item. Sebelon dipake dibuka dikit atas peci. Ada ruang antara pinggir ama tengah. Ada kertas kecil nyelip. Ya, itu isim dari gurunya Kong Dulleh dari Jumalang. Kacung inget bener pesen gurunya. Isi isim ini lebih beraat dari dunia seisinya dan langit seisinye. Jadi, jangan lu bawa kalau lo ke belakang. Padahal, isinya laailaahailallah..Tiada tuhan selain Allah. Kong Dulleh itu satu ilmu satu guru ama H. Naipin, gurunya si Pitung. Tokoh terkenal dari Betawi.

Terus ke kotak lemari kayu. Diambilnya beberapa cincin berbatu combong. Cincin berbentuk bullet lonjong. Dia dapat itu hadiah dari Mpek Ayun dari pasar proyek waktu die belain Ko Ayun dikeroyok preman Kaum. Kagak lupa, gelang bahar yang dia bikin sendiri dari akar kayu. Dia bikin khusus waktu pegi ke Krawang. Belajar silat ama mbah Uyut di atas gunung Sanggabuana.
Wuih, gagah bener si Kacung. Maklum mandor. Celana komprang sebetis. Kaos oblong dengan baju item longgar dibiarin tebuka. Kagak dikancingin. Seet dah, dia belon tahu neh kenalin si Kacung anak Gabus. Atinye berbisik. Bukan buat sombong, entu sugesti biar dia pede. Mau beklai. Dia pikir emang kebetulan, gua lagi cari pelampiasan.

Dia jalan kaki. Ke belakang, ke kali Bekasi. “OOn, anterin gua ke Tambelang. Pake perahu elu ya….”

“Iya bang….” Sahut Oni yang lagi berada di pinggiran kali. Zaman dulu kali Bekasi masih gede. Airnya juga masih banyak. Bisa dipake nguyur ke Muara. Ke arah Utara, Tambelang dan Sembilangan, Tarumajaya.

“Nyampe di sono ntar lu balik lagi. Lu jemput anak buah gua. Anterin tempat gue ada urusan…duitnya ntar gue bayar…”

“Iye bang….” Oni ngangguk pelan. Dia paham kalao si kacung ngutang. Jangan berharep dia bakal bayar. Ntar kalo ditagih marahan die. Oalaaah…nasiiib!
Nyampe di Muara, Kacung kudu jalan kaki lagi ke arah mentari terbit. Si Oni pulang kea rah gabus lagi. Nyampe di Gabus Oni ketemu ama nyak Rodieh.

“Eh, encing…darimana? Koq jatutt aza, kayak ayam gak makan-makan lima ari…”

“Diem luh…gua lagi marah ama abang lu…”

“Waduh…repot delapan belas neh…tadi Bang Kacung Oni anterin ke Tambelang cing…katenye ada urusan yang mao diselesin…”
“Wah…benneer…? Sialan…gua mao labrak abang malah kabur….awas aje kalo dia dah pulang….biar dia tahu rasa…”

Di pinggiran kali, ketemu ama anak buahnya Kacung. Ada delapan orang. Bawa golok semua. “Eh, ada mpok Rodieh, darimana mpook….”
“Au…!” sembari ngeloyor. Di belakangnye Udin ngucluk.
“Sst..nape tuh enyak lu…” Tanya Rindon ke Udin.
“Babeh kawin lagi….”
“Hah…” kaget. Tapi terus cekikikan.
“Ngeledek lu….?” Udin melotot, “gua gibeng abis lu…”
“Gak..gak…gak…”
“Lu pade mau kemana neh, mau nonton tanjidor?”
“Lah gua kagak tahu, kata si Bonin tadi gua ama anak-anak disuruh ke Tambelang. Ada masalah di sonoh katanye…”
“Ama babe..?”
“Iya..”
“Ya udah..sono dah…kalo ada apa-apa ama baba gua, lu bilangin gua ya….”
“ya..ya..”
Delappan orang naek perahu Oni. Nyusul Kacung.

Di lokasi, kacung udah merapal ajian ayat sebelas. Kun fayakuuun….tangan kere-nya ngelus si Toyok. Ngeliat Kacung jalan. Semua yang lagi kerja berenti.
Tanpa ba bi bu lagi, dia langsung tantangin. “Woiii…brenti..ini sawah gua. Sapa yang mau matok, gua bacok. Maju…. Siapa di sini yang udah bosen idup?!’
Tangan kirinya melepas si Toyok dari angkin. Kakinya mulain melebar. Membentuk kuda-kuda. Urat tanganya mulain mengeras.

Zuki yang lagi duduk di rumah-rumahan bangun. Dia ambil goloknya. Dia samperin si Kacung. “Cung, lu kagak kenal gua…neh Mandor Zuki dari Wates….”

“Heh..Zuki…Wates itu kudu nyium dengkul orang Gabus… Jangan macem-macem lu…”

“Brenti lo ngebacot…lu adepin aze elmu orang Wates….”

Ked

Article printed from Komunitas Blogger Bekasi: http://bloggerbekasi.com

URL to article: http://bloggerbekasi.com/2009/10/13/bekasih-begaya-4-dioncoq-bini-tua-ampuuuun.html

URLs in this post:

[1] Babak ke 2: http://bloggerbekasi.com/2009/10/11/bekasih-bekasih-begaya-3-cerpen-aselih-bikinan-bang-komar.html

Click here to print.