Nama Gue Udin

Baba atu

Enya atu

Ema tere atu

Nama gue Udin

Katanya, baba paling kaya

Maklum di desa orang kedua

Punya tipi gak berwarna

Tapi cukup bikin sekampung terpesona

Nama gue Udin

Baba berubah gak kaya lagi

Gara-gara demen sinden

Sinden berenti, dikawinin baba

Nama gue Udin

Tanah warisan Wa Niot dijual baba

Sepotong dibeliin tanah Kong Arpiah

Sepotong lagi buat bikin rumah

Sepotong lain dibawa ke bini muda

Beli sawah dan bikin rumah gedong

Enya marah-gerem

Jas kawin baba dibakar-gak lagi direndem

Stress ampe ayan-jatoh mendem

Mulut memuruh bebusa-busa-melek merem

Pingsan dibawah puun rukem

Pake baju ijo bebunga item

Memori kekal bikin dendem

Name gue Udin

Asli Bekasi gak ketulungan

Cerita gue, cerita anak bekasi

Baba atu, ema dua

Nama gue Udin

Hobi maen bola di lapangan tailan

Lapangan bola punya kong Nelan

Yang bikin kontrakan kagak bikin cubluk-selokan

Tukang sate, tukang sol di kontrakan kong Nelan

Kalo kebelet, pake sarung ke tengah lapangan

Celingak celinguk cari orang malem-malem

Gak ada orang angkat sarung nongkrong dalem-dalem

Lapangan kong Nelan yang sekarang jadi kolaan keren-nya bintang pelem

Nama gue Udin

Puyeng kepala mikirin Bekasi

Berubah kagak berisi

Dari Kampung Dua ampe kampung Dua ratus-

Berubah kagak puguh,keder kagak putus

Karang congok jadi Karang Satria

Rawa Tembaga lenyap jadi Perumnas Dua

Rawa Minyak ilang, jadi Galaksi

Kobak tempat ngebak berubah jadi Inkopad

Sawah Kulon jadi inkopol

Nama orang juga berubah

Uyutnya namanya Betok

Punya anak dinamain Betik

Punya cucu namanya Winih

Punya cicit namanya Apud

Nama gue Udin

Baba Mikam bini dua

Mamang Misar bini dua

Engkong Satab bini tiga

Uyut Majan bini delapan

Nah, gue berapa dong?

^[1]